ဆယ်စုနှစ် တစ်ခုနီးပါးအကြာမှ ပြန်လည်ထွက်ရှိလာတဲ့ Sony ရဲ့ RX1R Camera မျိုးဆက်သစ်

Sony ကုမ္ပဏီဟာ ၂၀၁၅ ခုနှစ်နောက်ပိုင်း ပထမဆုံးအကြိမ်အဖြစ် ဆယ်စုနှစ်တစ်ခုနီးပါးအကြာမှာ သူတို့ရဲ့ Fixed-lens Compact ကင်မရာဖြစ်တဲ့ RX1R ရဲ့ မျိုးဆက်သစ်ကို တရားဝင် ကြေညာလိုက်ပြီ ဖြစ်ပါတယ်။ RX1R III လို့ အမည်ပေးထားတဲ့ ဒီကင်မရာသစ်မှာ အရင်မျိုးဆက်ဟောင်းကလိုပဲ 35mm full-frame Exmor R sensor ကိုပဲ သုံးထားတာ ဖြစ်ပေမယ့် Megapixel ကိုတော့ 42.4 ကနေ 61 Megapixel အထိ မြှင့်တင်ထားတာ တွေ့ရပါတယ်။ နောက်ပြီး Sony ရဲ့ နောက်ဆုံးပေါ် Bionz XR နဲ့ AI image processor တွေကြောင့် လူရဲ့ ခန္ဓာကိုယ်လှုပ်ရှားမှုကို ခြေရာခံနိုင်ပြီး Head and eyes တွေကို ပိုမိုတိကျစွာ Focus ဖမ်းနိုင်တဲ့ autofocus စနစ်လည်း ပါဝင်လာပါတယ်။

Sony ပြောထားတာကတော့ RX1R III ကို လာမယ့် ဇူလိုင်လမှာ စတင်ရောင်းချမှာဖြစ်ပြီး ဈေးနှုန်းကတော့ ကန်ဒေါ်လာ 5,099.99 ခန့် ကျသင့်မှာ ဖြစ်ပါတယ်။ ဒီဈေးနှုန်းဟာ ၂၀၁၅ ခုနှစ်က ဒေါ်လာ 3,300 နဲ့ မိတ်ဆက်ခဲ့တဲ့ RX1R II ထက် အတော်လေးကို ဈေးကြီးလာတာပါ။

RX1R တွေမှာ Lens ကို ပြောင်းလဲတပ်ဆင်လို့မရတဲ့ အားနည်းချက်ရှိပေမယ့် RX1R III မှာတော့ Step Crop Shooting ဆိုတဲ့ function တစ်ခု ပါဝင်လာပါတယ်။ အဆိုပါ Function က Sensor Cropping နည်းပညာကိုသုံးပြီး 35mm, 50mm နဲ့ 70mm focal length တွေကို ပြောင်းလဲရိုက်ကူးနိုင်စေမှာပါ။ နောက်ပြီး Lens မှာပါတဲ့ Ring ကိုလှည့်ပြီး အနီးဆုံး 20cm အကွာက အရာဝတ္ထုတွေကို အနီးကပ်ရိုက်ကူးနိုင်မယ့် Macro Mode လည်း ပါဝင်ပါသေးတယ်။ Camera Body ကိုတော့ Magnesium alloy နဲ့ ပြုလုပ်ထားတာ ဖြစ်ပြီး ကင်မရာကို ပေါ့ပါးပြီး သယ်ဆောင်ရလွယ်ကူအောင် ပြုလုပ်တဲ့နေရာမှာ အရင်မျိုးဆက်ကလို Up and Down လှုပ်ရှားနိုင်တဲ့ Screen အစား၊ လှုပ်ရှားလို့မရတဲ့ Fixed Screen ကို ပြောင်းလဲအသုံးပြုထားတာ တွေ့ရပါတယ်။

Performance ပိုင်းမှာတော့ တစ်စက္ကန့်ကို 5 Frames နှုန်းနဲ့ပဲ အများဆုံး ရိုက်ကူးနိုင်မှာပါ။ Video ပိုင်းမှာတော့ RX1R II က 1080p အထိပဲ ရိုက်ကူးနိုင်ခဲ့ပေမယ့်၊ အခု RX1R III မှာတော့ 4K 30fps/1080p 120fps အထိ ရိုက်ကူးနိုင်လာပြီး၊ Cinematic Look အတွက် Sony ရဲ့ S-Cinetone picture profile ကိုလည်း အသုံးပြုနိုင်မှာ ဖြစ်ပါတယ်။