iOS 26 Update အသစ်ကြောင့် iPhone 16 မော်ဒယ်တွေမှာ 25W Wireless Charging ရရှိတော့မည်

Apple က တရားဝင်တော့ မကြေညာသေးပေမယ့်၊ လာမယ့် iOS 26 update အသစ်က iPhone 16 သုံးစွဲသူတွေအတွက် သတင်းကောင်းတစ်ခု ယူဆောင်လာပါပြီ။ iPhone 16, 16 Plus, 16 Pro နဲ့ 16 Pro Max မော်ဒယ်တွေမှာ 25W Qi2 wireless charging support ကို ထည့်သွင်းပေးလိုက်တာပဲ ဖြစ်ပါတယ်။ ဒါပေမယ့် iPhone 16e အတွက်တော့ ဒီ feature မှာ ပါဝင်မှာမဟုတ်ဘူးလို့ သိရပါတယ်။

ဒီ Feature က ဘာထူးခြားသွားလဲဆိုတော့… အရင်တုန်းက iPhone 16 တွေကို 25W wireless charging အမြန်နှုန်းရဖို့ဆိုရင် Apple ရဲ့ MagSafe Charger အသစ်နဲ့ပဲ အားသွင်းလို့ရတာပါ။ တခြား third-party Qi charger တွေက 15W အထိပဲ အများဆုံးရတာ ဖြစ်ပါတယ်။ အခု iOS 26 update ပြီးသွားရင်တော့ “Qi2 25W” လို့တရားဝင်သတ်မှတ်ထားတဲ့ Qi 2.2 charger ဘယ်အမျိုးအစားနဲ့မဆို 25W အမြန်နှုန်းအပြည့်ကို ရရှိတော့မှာ ဖြစ်ပါတယ်။

ဒီသတင်းကို ဘယ်လိုအတည်ပြုခဲ့ လဲဆိုတော့ နာမည်ကြီး Accessory Brand တစ်ခုဖြစ်တဲ့ Belkin က Qi2 25W charger အသစ် ၃ မျိုးကို ဒီတစ်ပတ်မှာပဲ ထုတ်လုပ်လိုက်ပြီး သူတို့ရဲ့ Charger တွေက iOS 26 တင်ထားတဲ့ iPhone 16 တွေကို မိနစ် ၃၀ အတွင်းမှာ 0% ကနေ 50% အထိ အားသွင်းပေးနိုင်တယ်လို့ အတည်ပြုခဲ့ပါတယ်။ ဒါက Apple ရဲ့ MagSafe Charger နဲ့ အားသွင်းချိန် အတူတူပါပဲ။

အဆိုပါ Feature ကို iOS 26 beta version တွေမှာ အခုကတည်းက စတင်စမ်းသပ်လို့ရနေပြီဖြစ်ပြီး၊ iOS 26 ကိုတော့ လာမယ့် စက်တင်ဘာလမှာ ဖြန့်ချီဖွယ်ရှိပါတယ်။

ဒီပြောင်းလဲမှုက သေးသေးလေးလို့ထင်ရပေမယ့် သုံးစွဲသူတွေအတွက်တော့ တကယ့်ကို အကျိုးရှိတဲ့ Update တစ်ခုပါ။ အရင်ကလို အမြန်ဆုံးအားသွင်းနိုင်ဖို့ Apple ရဲ့ charger တစ်မျိုးတည်းကိုပဲ ဈေးကြီးပေးပြီး ဝယ်စရာမလိုတော့ပါဘူး။ Belkin လိုမျိုး တခြား brand တွေဆီက ဈေးနှုန်းပိုသက်သာပြီး အရည်အသွေးကောင်းတဲ့ charger တွေကို ရွေးချယ်ခွင့် ပိုရလာမှာ ဖြစ်ပါတယ်။ ဒါက Apple က သူ့ရဲ့ Ecosystem ကို တဖြည်းဖြည်း ပိုပြီးပွင့်လင်းလာအောင် လုပ်ဆောင်လာတာကို ပြနေပြီး၊ iPhone 17 နဲ့ နောက်ထွက်မယ့် iPhone တွေမှာလည်း ဒီ feature က ဆက်ပြီးပါဝင်လာမှာ သေချာသလောက်ပါပဲ။