Google ဟာ Browser Tabs မှာ Web App ဖန်တီးနိုင်မယ့် Disco လို့ ခေါ်တဲ့ Tools ကို မိတ်ဆက်

ဒီဇင်ဘာလ ၁၁ ရက်နေ့ ကြာသပတေးနေ့တုန်းက Google ဟာ Disco လို့ခေါ်တဲ့ Gemini နဲ့ အလုပ်လုပ်တဲ့ AI Tools အသစ်ကို မိတ်ဆက်ပေးခဲ့တာ ဖြစ်ပါတယ်။ Disco နဲ့ GenTabs ကို ဖန်တီးနိုင်မှာ ဖြစ်ပြီး ၎င်းဟာ Chrome Browser နဲ့တွဲပြီး အလုပ်လုပ်မှာ ဖြစ်ကြောင်း သိရပါတယ်။

Chrome Browser အသုံးပြုသူများဟာ GenTabs ကြောင့် မိမိပြုလုပ်နေတဲ့ အလုပ် (သို့မဟုတ်) လေ့လာနေတဲ့ အကြောင်းအရာများကို ပိုမိုရှင်းလင်းပြီး လွယ်ကူစွာ သိရှိနားလည်နိုင်ဖို့ ကိုယ်တိုင် Web App တစ်ခုကို Chrome Browser ထဲမှာပဲ ဖန်တီးနိုင်တော့မှာ ဖြစ်ပါတယ်။ Web App ကို ဖန်တီးပြီးသွားရင်လည်း မိမိစိတ်ကြိုက် ကိုယ်ပိုင် ဘာသာစကားနဲ့ Chat Box မှာ Prompts ရိုက်ကာ ပြုပြင်နိုင်အုံးမှာ ဖြစ်ပါတယ်။ GenTabs ဟာ Browser မှာ ဖွင့်ထားတဲ့ Tabs တွေကို ပေါင်းစည်းပြီး အလုပ်လုပ်ပေးမှာ ဖြစ်သလို Gemini ရဲ့ Chat Box ထဲရှိ History ကိုလည်း ရယူကာ အလုပ်လုပ်မှာ ဖြစ်ကြောင်း Google ရဲ့ ရှင်းပြချက်အရ သိရပါတယ်။

ဒါ့အပြင် တခြားသော AI Browser တွေမှာ ပြုလုပ်နိုင်တဲ့ စားသောက်ဆိုင် ရှာဖွေပြီး Booking ပြုလုပ်ခြင်း၊ ခရီးစဥ်အတွက် Plan ရေးဆွဲခိုင်းခြင်း အစရှိတာတွေကိုပါ ပြုလုပ်နိုင်မှာ ဖြစ်ကြောင်း သိရပါတယ်။ Google ဟာ အခြား AI ကုမ္ပဏီတွေလိုမျိုး သီးသန်း AI Browser ကို မဖန်တီးတော့ပဲ Chrome Browser ကိုပဲ Disco နဲ့ AI Browser အဖြစ် အဆင့်မြှင့်တင်လိုက်တာ ဖြစ်ပါတယ်။ Google ရဲ့ ပြောပြမှုအရ Disco ဟာ အခုမှ အစဖြစ်ပြီး GenTabs ဟာလည်း Disco ရဲ့ တစ်စိတ် တစ်ပိုင်းသော Feature တစ်ခုသာ ဖြစ်တာကြောင့် တခြား စိတ်ဝင်စားစရာကောင်းတဲ့ Features တွေ ထပ်လာအုံးမှာ ဖြစ်ကြောင်း သိရပါတယ်။

လက်ရှိမှာ Disco ဟာ စမ်းသပ်ဆဲကာလဖြစ်ပြီး Google Labs ရှိ အသုံးပြုသူ အနည်းငယ်ကိုသာ စမ်းသပ်ဖို့ ခွင့်ပြုထားကြောင်း သိရပြီး ကျွန်တော်တို့ အားလုံးအတွက် ဘယ်အချိန်မှာ ထုတ်ပေးမလဲ ဆိုတာကိုတော့ ပြောပြထားခြင်း မရှိသေးပါဘူး။