ကားပိုင်ရှင်တိုင်း ခေါင်းမကိုက်တဲ့ ပိုင်ရှင်မရှိပါဘူး။ ကားတစ်စီး ပိုင်ဆိုင်ထားပြီဆိုရင် ပြင်ဆင်စရိတ်၊ အာမခံ နှင့် အခြားမမြင်ရတဲ့စရိတ်တွေက ကားပိုင်ရှင်တွေကို ခေါင်းကိုက်စေပါတယ်။ ကားပြန်ရောင်းမယ်ဆိုရင်လည်း ပြန်ဝယ်ဖို့အတွက် နောက်ထပ်စဉ်းစားစရာတွေက အများကြီးရှိနေပါတယ်။ ကားတစ်စီးဝယ်ယူဖို့ ဒီမေးခွန်းကို သင့်ကိုယ်သင် အရင်ပြန်မေးကြည့်ပါ။
ကားတစ်စီး အမှန်တစ်ကယ် လိုအပ်လား?
သင့်အတွက် ကားမလိုအပ်ပဲ ကားတစ်စီးဝယ်လိုက်ပါက သင့်အတွက်ကုန်ကျစရိတ်တွေက လစဉ်နဲ့အမျှ တက်နေပါလိမ့်မယ်။ ကားတစ်စီးဝယ်ထားပြီး အိမ်မှာချောင်ထိုးထားရင်တော့ သင့်ပိုက်ဆံကို ဖြုန်းနေတာနဲ့တူတူပါပဲ။ အကြောင်းရင်းကတော့ ကြာကြာရပ်ထားတဲ့ကားတစ်စီးက တစ်ကယ်တမ်းမောင်းတဲ့အခါ လိုအပ်ချက်တွေအများကြီးပေါ်လာနိုင်လို့ပါပဲ။ သင့်မှာ ကိုယ်ပိုင်ကားမရှိရင် တစ်နှစ်ကို ဒေါ်လာတစ်သောင်းလောက် သက်သာနိုင်တယ်လို့ ပညာရှင်တွေက တွက်ချက်ကြပါတယ်။ ဒီထက်တောင် ပိုသက်သာနိုင်ပါသေးတယ်။ အလုပ်နဲ့ အိမ်သွားရမယ့် ခရီးအကွာအဝေးက မနီးမဝေးရင်တော့ ဆိုင်ကယ်လေးတစ်စီး ဝယ်ထားတာက သင့်အတွက် အလုပ်လည်းတွင်ပြီး ကုန်ကျမှုအများကြီး သက်သာနိုင်စေပါတယ်။
အကယ်၍ မဖြစ်မနေ ကားတစ်စီးလိုအပ်ခဲ့ရင်?
မဖြစ်မနေ ကားတစ်စီးလိုအပ်ခဲ့မယ်ဆိုရင်တော့ လျှပ်စစ်ကားနဲ့ ဓါတ်ဆီကားနှစ်မျိုးရှိပါတယ်။ နိုင်ငံတော်တော်များများမှာ လျှပ်စစ်ကားတွေ အသုံးပြုကြတယ်ဆိုပေမယ့် မြန်မာနိုင်ငံလိုနိုင်ငံမှာတော့ လျှပ်စစ်ကားတွေကို မရွေးချယ်သင့်ပါဘူး။ သင်က နိုင်ငံရပ်ခြားမှာနေတယ်ဆိုရင်တော့ လျှပ်စစ်ကားအကြောင်း အနည်းနဲ့အများ တီးခေါက်မိပါလိမ့်မယ်။ လျှပ်စစ်ကားရဲ့အားသာချက်က ဆီထည့်စရာမလိုပဲ ဆီအတွက် ကုန်ကျစရိတ် အများကြီး သက်သာနိုင်လို့ပါပဲ။
ကားဘယ်လောက်တန်ကို ရွေးချယ်သင့်လဲ?
ဒါကတော့ သင့်အပေါ်ပဲမူတည်ပါတယ်။ သင်က အိမ်ကမိသားစုလောက်နဲ့ပဲ ခရီးသွားတာမျိုး တစ်ခါတစ်လေ လုပ်မယ်ဆိုရင်တော့ အလယ်အလတ်ကားလောက် ဝယ်သင့်ပါတယ်။ စျေးကွက်ထဲမှာ လျှပ်စစ်ကားမျိုးစုံရှိပြီး စျေးတွေလည်း အနည်းနဲ့အများ ပုံစံမျိုးစုံရှိကြပါတယ်။ စျေးသက်သာတဲ့ လျှပ်စစ်ကားထဲကဆိုရင် MG တို့လို လျှပ်စစ်ကားတွေရှိပါတယ်။ မြို့တွင်းလောက်သွားတာမျိုးဆိုရင်တော့ Honda က ထုတ်တဲ့ EV ကားသေးလေးတွေမျိုး၊ Nissan က ထုတ်တဲ့ ကားမျိုးတွေဆိုရင်တော့ သင့်အတွက် လုံလောက်ပါတယ်။ အကောင်းဆုံးတွေထဲကရွေးမယ်ဆိုရင်တော့ Tesla နဲ့ Rivian တို့လိုကားကောင်းတွေ ရှိပါတယ်။
လျှပ်စစ်ကားတွေကို အားဘယ်လိုသွင်းရမလဲ?
ဒီအချက်ကတော့ အရေးကြီးဆုံးအချက်ဖြစ်ပါတယ်။ ပထမဆုံး level 1 အားသွင်းတဲ့အဆင့် ပြောပြပါမယ်။ level1 ကတော့ အိမ်ကလျှပ်စစ်မီးနဲ့ပဲ အားသွင်းရပြီး ပါဝါအားအနေနဲ့ကတော့ 120V ရှိပါတယ်။ မြို့ထဲပဲအသုံးပြုတာများတယ်ဆိုရင်တော့ လျှပ်စစ်ကားကို နေ့တိုင်းအားသွင်းစရာတောင် မလိုပါဘူး။ Level2 အဆင့်အားသွင်းတာကတော့ လူတိုင်းလိုလို အိမ်မှာသွင်းကြပါတယ်။ level1 နဲ့ ပုံစံတူပေမယ့် အားအနေနဲ့ level1 ထက်ပိုဝင်ပြီး အချိန်လည်းတိုစေပါတယ်။ Level3 ကတော့ အမြင့်ဆုံးဖြစ်ပြီး အားခဏလေးသွင်းရုံနဲ့ အားအပြည့်ရနိုင်ပါတယ်။ level2 ထက် အဆနှစ်ဆယ်စွမ်းအားမြင့်ပြီး fast charging လို့လည်း လူအများက သိကြပါတယ်။ Kilowatt hours (kwh) ပေါ်မူတည်ပြီး အားဘယ်လောက်သွင်းနိုင်လဲဆိုတာ ကွာသွားနိုင်ပါတယ်။ တိုးတက်တဲ့နိုင်ငံတော်တော်များများမှာတော့ အားသွင်းနိုင်တဲ့ stations တွေရှိပြီး အားအလွယ်တကူသွင်းနိုင်ပါတယ်။ Shopping Center တွေမှာဆို အားသွင်းဖို့အတွက် နေရာတော်တော်များများထားပေးထားပြီး ကားလည်းအခမဲ့ရပ်နိုင်ပါတယ်။
ခရီးရှည်တွေအတွက် အဆင်ပြေပါ့မလား?
တစ်ခါအားအပြည့်သွင်းရင် မိုင်နှစ်ရာလောက် သွားနိုင်တဲ့ လျှပ်စစ်ကားမျိုးဆိုရင် လူတော်တော်များများအတွက် အဆင်ပြေနိုင်ပါပြီ။ သင်က ခရီးရှည်ခဏခဏသွားတဲ့လူမျိုးဆိုရင် EV car မဝယ်ခင် သေချာတွက်ချက် စဉ်းစားဖို့လိုပါလိမ့်မယ်။ လျှပ်စစ်ကားတွေက အေးတဲ့နေရာဖြစ်ဖြစ် ပူတဲ့နေရာဖြစ်ဖြစ် အခြားဓါတ်ဆီကားနည်းတူ မောင်းနှင်နိုင်ပါတယ်။ လျှပ်စစ်ကားအသုံးပြုခြင်းက ရည်ရှည်မှာ ကုန်ကျစရိတ်သက်သာနိုင်ပြီး သဘာ၀ပတ်ဝန်းကျင်အတွက်လည်း အများကြီးကောင်းမွန်စေပါတယ်။