Apple ကတော့ MacBook Air, MacBook Pro နဲ့ Studio Display monitor အသစ်တွေကို တရားဝင်မိတ်ဆက်လိုက်ပါပြီ။ ဒီတစ်ခေါက် update ကတော့ ဒီဇိုင်းအကြီးအကျယ်ပြောင်းလဲတာမျိုးမဟုတ်ဘဲ အတွင်းပိုင်းကို အဆင့်မြှင့်တင်ထားတာဖြစ်ပြီး၊ အဓိကအချက်ကတော့ storage ပိုများလာသလို ဈေးလည်းတက်သွားတာပါပဲ။
M5 Chip နဲ့ MacBook Air အသစ်
MacBook Air အသစ်မှာတော့ M5 chip ကို အဆင့်မြှင့်တင်ပေးလိုက်ပါပြီ။ တခြားအကြီးအကျယ်ပြောင်းလဲမှုမရှိပေမယ့်၊ အဓိကကွာခြားသွားတာကတော့ Base model ရဲ့ storage ကို 512GB ကနေ စတင်ပေးလိုက်တာပါပဲ။ Wi-Fi 7 နဲ့ Bluetooth 6 ပါတဲ့ N1 wireless chip အသစ်လည်း ပါဝင်လာပါတယ်။ ဒါပေမယ့် storage တိုးသွားတဲ့အတွက် ဈေးနှုန်းကလည်း $100 တက်သွားပြီး 13-inch model ကို $1,099 ကနေ စတင်ရောင်းချမှာ ဖြစ်ပါတယ်။
M5 Pro/Max နဲ့ MacBook Pro အသစ်
ပိုပြီးစိတ်ဝင်စားဖို့ကောင်းတာကတော့ 14-inch နဲ့ 16-inch MacBook Pro တွေမှာ M5 Pro နဲ့ M5 Max chip အသစ်တွေ ရရှိလာတာပါပဲ။ Apple ရဲ့ အဆိုအရ ဒီ chip အသစ်တွေက M4 series ထက် multi-core performance ပိုင်းမှာ 30% အထိ ပိုမြန်လာပြီး AI နဲ့ပတ်သက်တဲ့ အလုပ်တွေမှာဆိုရင် 4 ဆအထိ ပိုမြန်လာပါတယ်တဲ့။ MacBook Air လိုပဲ Pro model တွေမှာလည်း base storage ကို 1TB အထိ နှစ်ဆတိုးပေးလိုက်ပြီး ဈေးနှုန်းကလည်း အရင်နှစ်ကထက် $200 တက်သွားပါတယ်။ ဒီဇိုင်း၊ display နဲ့ port တွေကတော့ အရင်အတိုင်း မပြောင်းလဲပါဘူး။
နောက်ပြီး လေးနှစ်ကြာပျောက်ကွယ်နေခဲ့တဲ့ Studio Display ကိုလည်း Apple က model အသစ်နှစ်မျိုးနဲ့ ပြန်လည်မိတ်ဆက်ခဲ့ပါတယ်။
- Standard Studio Display ($1,599): ဈေးနှုန်းက အရင်အတိုင်းပါပဲ။ ဒါပေမယ့် 12MP camera အသစ်၊ bass သံ 30% ပိုကောင်းလာတဲ့ speaker နဲ့ ပိုမြန်တဲ့ Thunderbolt 5 port တွေ ပါဝင်လာပါတယ်။
- Studio Display XDR ($3,299): ဒါက အရင် 32-inch Pro Display XDR ကို အစားထိုးလိုက်တာပါ။ Screen က 27-inch ပဲရှိတော့ပေမယ့် 120Hz refresh rate နဲ့ ပိုတောက်ပတဲ့ mini-LED display အသစ်ကို သုံးပေးထားပါတယ်။ ဈေးနှုန်းကလည်း အရင် Pro Display XDR ထက် $1,700 လောက် သက်သာသွားပါတယ်။
တကယ်တမ်းမှာတော့ ဒါက သုံးစွဲသူတွေအတွက် ရွေးချယ်ရခက်စေမယ့် update တစ်ခုပါ။ Performance ပိုကောင်း၊ storage ပိုများတာ မှန်ပေမယ့် ဈေးပိုပေးရမှာဖြစ်ပြီး၊ ဒီနှစ်ကုန်ပိုင်းမှာ M6 chip, OLED touchscreen နဲ့ ဒီဇိုင်းအသစ်ပါတဲ့ MacBook Pro အကြီးစား update ထပ်လာဦးမယ်လို့ သတင်းတွေထွက်နေတာကြောင့် အခုချက်ချင်းဝယ်မလား၊ အသစ်ကိုပဲ စောင့်မလားဆိုတာကတော့ စဉ်းစားစရာတစ်ခု ဖြစ်လာပါပြီ။