Computer Software လောကမှာ ဘုရင်တစ်ဆူဖြစ်တဲ့ Adobe ကို မသိတဲ့သူမရှိပါဘူး။ Adobe လုပ်ငန်းကို တွဲဖက်တည်ထောင်ခဲ့တဲ့ ဖခင်တစ်ဦးလည်း ဖြစ်တဲ့အပြင် ကျွန်တော်တို့ နေ့စဉ် အလုပ်နဲ့ပတ်သတ်တဲ့ Documents တွေပို့တဲ့ နေရာမှာ အသုံးပြုတဲ့ Format ကို တီထွင်ခဲ့တဲ့ PDF ဖခင် John Warnock က ဩဂုတ်လ ၁၉ရက်နေ့ ၂၀၂၃ခုနှစ်မှာတော့ ကွယ်လွန်သွားခဲ့ပါပြီ။ ကွယ်လွန်ရတဲ့ အဓိကအကြောင်းရင်းကတော့ Pancreatic Cancer ကြောင့်ဖြစ်ပါတယ်။
PDF ကို ၁၉၈၂ ခုနှစ်မှာ ဒေါက်တာ Warnock က စတင်တီထွင်ခဲ့ခြင်းဖြစ်ပါတယ်။ Dr Warnock က PDF Format ကို မတီထွင်ခဲ့စဉ်အထိ ပုံနှိပ်ခြင်းဆိုတာ ခက်ခဲတဲ့အလုပ်တစ်ခု ဖြစ်ခဲ့ပါတယ်။ ပုံနှိပ်တဲ့လူတွေက နေရာအကျယ်ကြီးကို လိုအပ်ပြီး ပုံနှိပ်ဖို့အတွက် အထူးထုတ်လုပ်ထားတဲ့ Printer တွေနဲ့ ပုံနှိပ်ရတာဖြစ်ပြီး ကုန်ကျစရိတ်လည်း များခဲ့ပါတယ်။ ဒီလိုဖြစ်ရတဲ့အကြောင်းရင်းကတော့ PDF ဆိုတဲ့ Format မရှိတာကြောင့် ဖြစ်ပါတယ်။ PDF ရဲ့ ပထမဆုံးနာမည်က PostScript လို့ခေါ်ပြီး ၁၉၈၅ ခုနှစ်မှာ စတင်ထွက်ရှိခဲ့ပါတယ်။ PostScript ထွက်လာပြီးနောက်မှာတော့ ကွန်ပျူတာ Companies နှင့် Software Companies တွေနဲ့ လိုင်စင်သဘောတူညီမှုတွေ ရယူခဲ့ပါတယ်။ ဒီအချက်ကပဲ Adobe Company ကို ချမ်းသာလာစေခဲ့ပါတယ်။ ၁၉၉၃ ခုနှစ်မှာတော့ ကွန်ပျူတာတိုင်းမှာ Documents တွေကိုဖတ်လို့ရနိုင်မယ့် PDF ကို လူသိရှင်ကြား မိတ်ဆက်ခဲ့ပါတယ်။
PDF ရဲ့ အဓိက ရည်ရွယ်ချက်က ရုပ်ပုံ၊ စာသားတွေကို ဘယ်ကွန်ပျူတာမဆို၊ ဘယ် Printer မှာမဆို တူတူညီညီဖတ်လို့ရအောင် ဖန်တီးခဲ့ခြင်းဖြစ်ပါတယ်။ Acrobat နှင့် PDF က စစထုတ်ခြင်းမှာ အောင်မြင်မှုမရရှိခဲ့ပါဘူး။ လူတိုင်း ကွန်ပျူတာကတစ်ဆင့် Free Download လုပ်နိုင်အောင် ဖန်တီးခဲ့တာတောင် အောင်မြင်မှုမရရှိခဲ့ပါဘူး။
Dr.Warnock ကတော့ ဇွဲမလျှော့ခဲ့ပဲ ဆက်လက်ကြိုးစားခဲ့ပါတယ်။ PDF နှင့်အတူ InDesign, Photoshop နှင့် Illustrator တို့ကိုလည်း Dr.Warnock က ဖန်တီးခဲ့ပါတယ်။
Dr.John Edward Warnock ကို အောက်တိုဘာလ ၆ ရက် ၁၉၄၀ ခုနှစ်မှာ စတင်မွေးဖွားခဲ့ပါတယ်။ ဖခင်ကတော့ Clarence လို့အမည်ရပြီး ရှေ့နေတစ်ဦးဖြစ်ပါတယ်။ အထက်တန်းမှာ သင်္ချာမတော်ခဲ့တဲ့ ကျောင်းသားတစ်ယောက်ဖြစ်ခဲ့ပါတယ်။ သို့ပေမယ့် ၁၉၆၁ ခုနှစ်မှာ တက္ကသိုလ်မှာ သင်္ချာဘာသာရပ်ကို သင်ယူခဲ့ပြီး ၁၉၆၄ ခုနှစ်မှာတော့ သင်္ချာဘာသာရပ်နှင့် မာစတာဘွဲ့ရရှိခဲ့ပါတယ်။ အစမှာတော့ Dr.Warnock က နည်းပညာနယ်ပယ်ထဲကို ဝင်ရောက်ဖို့ စိတ်ကူးမရှိခဲ့ပါဘူး။ နွေရာသီကျောင်းပိတ်ရက်မှာ IBM က သင်္ချာပညာရှင်တွေကို အလုပ်ခေါ်နေတဲ့ ကြေငြာစာကြောင့် အလုပ်စတင် ဝင်ရောက်ခဲ့ရင်း နည်းပညာဘက်ကို ခြေလှမ်းချခဲ့ပါတယ်။ ၁၉၆၅ ခုနှစ်မှာ Marva Mullins ကို လက်ထက်ခဲ့ပြီး သားနှစ်ယောက်နှင့် သမီးတစ်ယောက် ထွန်းကားခဲ့ပါတယ်။
၁၉၆၉ ခုနှစ်မှာ ဒေါက်တာဘွဲ့ကို ရရှိခဲ့ပြီး San Franscisco က Company တစ်ခုမှာ ဝင်ရောက်လုပ်ကိုင်ခဲ့ပါတယ်။ ထို Company ကိုတော့ သူ့ရဲ့လေးစားအားကျရတဲ့ ပုဂ္ဂိုလ်နှစ်ဦးဖြစ်တဲ့ David C.Evans နှင့် Ivan Sutherland က တည်ထောင်ခဲ့ပါတယ်။ Company ရဲ့ နယ်ပြောင်းတာဝန်ကြောင့် ကာလီဖိုးနီးယားပြည်နယ်ကို ပြောင်းရွှေ့ခဲ့ရပြီး Xerox Computer Company မှာဆက်လက် လုပ်ကိုင်ခဲ့ပါတယ်။ ထို Company မှာပဲ သူ့ရဲ့ သူငယ်ချင်းဖြစ်တဲ့ Dr.Geschke ကိုတွေ့ရှိခဲ့ပြီး Printer ကတစ်ဆင့် ရုပ်ပုံ၊စာတွေကို ထုတ်ဖို့ အလွယ်ကူဆုံးနည်းလမ်းကို ရှာဖွေကြိုးစားခဲ့ပါတယ်။ နောက်ဆုံးအဖြေတွေ့ရှိခဲ့တဲ့အခါမှာတော့ Company သူဌေးကို သူတို့ရဲ့အလုပ်ကိုတင်ပြခဲ့ပါတယ်။ ကံအားသင့်လျော့စွာနဲ့ပဲ သူဌေးရဲ့ စိတ်ဝင်စားမှုကို မရရှိခဲ့ပါဘူး။
၁၉၈၂ ခုနှစ်မှာတော့ သူငယ်ချင်းနှစ်ယောက်လုံး အလုပ်ထွက်လာခဲ့ပြီး ကိုယ်ပိုင် Company Adobe System ကို စတင်တည်ထောင်ခဲ့ပါတယ်။ Adobe Company စတည်တည်ထောင်ခဲ့တဲ့ အချိန်က Silicon Valley မှာ ပြိုင်ဖက်နည်းပညာ Companies များစွာရှိခဲ့ပြီး Adobe ကို နည်းမျိုးစုံနှင့် ယှဉ်ပြိုင်ခဲ့ပေမယ့် Adobe က ဆက်လက်တည်ရှိနေစမြဲ ဖြစ်ခဲ့ပါတယ်။ ၂၀၀၁ ခုနှစ်မှာတော့ Dr.Warnock က Company က CEO ရာထူးနှုတ်ထွက်ခဲ့ပြီး အနားယူခဲ့ပါတယ်။ ၂၀၀၉ ခုနှစ်မှာ အမေရိကန် သမ္မတဟောင်း အိုဘားမားပေးခဲ့တဲ့ ”National Medal of Technology and Innovation” ဆုကို Adobe System တည်ထောင်ခဲ့တဲ့ သူငယ်ချင်းနှစ်ယောက်လုံး Dr.Warnock နှင့် Dr.Geschke တို့ရရှိခဲ့ပါတယ်။