ယနေ့ ကမ္ဘာပေါ်မှာ စီးပွားရေးအရ အင်အားကြီးတဲ့ နိုင်ငံတွေရှိပါတယ်။ ဥပမာ ဂျပန်၊ တရုတ်၊ ဂျာမနီနဲ့ အခြားနိင်ငံတွေဖြစ်ပါတယ်။ ဒီနိုင်ငံတွေအားလုံးကို ကျော်တက်ပြီး ၂၀၇၅ ခုနှစ်မှာတော့ အိန္ဒိယနိုင်ငံက ဒုတိယအကြီးဆုံး စီးပွားရေးနိုင်ငံဖြစ်လာမယ်လို့ “Goldman Sachs” မှ အတိအလင်း ပြောကြားခဲ့ပါတယ်။ Goldman Sachs ဆိုတာက ကမ္ဘာပေါ်မှာ လူသိများတဲ့ အမေရိကန်နိုင်ငံမှ ရင်းနှီးမြှုပ်နှံမှုဘဏ်နှင့် ငွေကြေးဝန်ဆောင်မှု ကုမ္ပဏီတစ်ခု ဖြစ်ပါတယ်။
အခုချိန်မှာ အိန္ဒိယက ဂျာမနီ၊ ဂျပန်၊ တရုတ်နှင့် အမေရိကန်နိုင်ငံပြီးရင်တော့ ကမ္ဘာပေါ်မှာ ငါးခုမြောက် စီးပွားရေးအင်အားအကြီးဆုံးနိုင်ငံအဖြစ် ရပ်တည်နေပါတယ်။ နောက်အနှစ် နှစ်ဆယ်ကြာရင် အိန္ဒိယနိုင်ငံက အခြားနိုင်ငံတွေအပေါ် မှီခိုအားထားနေရတာ အနည်းဆုံးဖြစ်သွားနိုင်တယ်လို့လည်း ရင်းနှီးမြှုပ်နှံမှုဘဏ်ဖြစ်တဲ့ Goldman Sachs သုတေသီတွေကလည်း သုံးသပ်ထားပါတယ်။
နိုင်ငံတစ်နိုင်ငံရဲ့ မှီခိုအားထားမှုအချိုးကို
နိုင်ငံတစ်နိုင်ငံရဲ့ မှီခိုအားထားမှုအချိုးကို ထိုနိုင်ငံအတွင်းမှာရှိတဲ့ လုပ်သားဦးရေနဲ့ တွက်ချက်ပါတယ်။ မှီခိုအားထားမှုအချိုးနည်းရင် ထိုနိုင်ငံအတွင်းမှာရှိတဲ့ လူငယ်များက အလုပ်များများလုပ်လာကြပြီး အသက်ကြီးတဲ့လူတွေကို ပြန်လည်ထောက်ပံ့နိုင်တယ်လို့ အဓိပ္ပါယ်ရပါတယ်။ အိန္ဒိယနိုင်ငံရဲ့ လူဦးရေတိုးလာတာနဲ့အမျှ လုပ်သားဦးရေလည်း တိုးပွားလာပြီး နိုင်ငံရဲ့ စီးပွားရေးကလည်း တစ်ရှိန်ထိုး တိုးတက်လာပါတယ်။ ဆိုလိုတာကတော့ အိန္ဒိယနိုင်ငံက ကမ္ဘာ့စီးပွားရေးလုပ်ဖို့အတွက် တံခါးပေါက် ဖွင့်ပေးလိုက်ခြင်းပါပဲ။
![](https://bunny-wp-pullzone-wi4ruizkvc.b-cdn.net/wp-content/uploads/2023/07/india-workers.jpeg)
အိန္ဒိယနိုင်ငံအစိုးရကလည်း တစ်နိုင်ငံလုံးမှာ လမ်းပန်းဆက်သွယ်ရေးတွေ ကောင်းမွန်လာဖို့အတွက် လမ်း၊တံတားတွေ အပြည့်ခင်းနေပါတယ်။ ဒီလိုလုပ်တာက အလုပ်အကိုင်နဲ့ ကုန်သွယ်ရေးလမ်းကြောင်းအတွက် များစွာအထောက်အကူ ဖြစ်လာပါတယ်။
နည်းပညာနယ်ပယ် နှင့် ရင်းနှီးမြှုပ်နှံမှုနယ်ပယ်
နိုင်ငံရဲ့ ဝင်ငွေကိုကြည့်မယ်ဆိုရင် ၂၀၂၃ခုနှစ် အကုန်ပိုင်းမှာ အမေရိကန်ဒေါ်လာ ၂၄၅ဘီလီယံထိ တိုးလာမယ်လို့ ပညာရှင်တွေက သုံးသပ်ထားပါတယ်။ နိုင်ငံတော်အမြတ်ဝင်ငွေရဲ့ အဓိကနယ်ပယ်တွေကတော့ နည်းပညာပိုင်းနယ်ပယ်၊ ဆော့ဝဲလ်ကုမ္ပဏီတွေနှင့် အခြားစီးပွားရေးနယ်ပယ်တွေက အဓိကဖြစ်ပါတယ်။ နိုင်ငံရဲ့ မှီခိုအားထားမှု အချိုးနည်းလာတာနဲ့အတူ ငွေကြေးတန်ဖိုးလည်း တက်လာပြီး ဝင်ငွေတွေလည်း အများကြီးရလာနိုင်ပါတယ်။ ဒီငွေကြေးတွေက နိုင်ငံရဲ့ အနာဂတ်အတွက် ရင်းနှီးမြှုပ်နှံမယ့် ငွေကြေးတွေအတွက် များစွာာ အထောက်အကူဖြစ်ပါတယ်။
ဆုံးရှုံးမှုရှိတဲ့ ဖြစ်နိုင်ချေများ
ပညာရှင်တွေက စီးပွားရေးအတွက် အကောင်းဘက်က သုံးသပ်ကြသလို ဖြစ်နိုင်ချေရှိတဲ့ ဆုံးရှုံးမှုတွေဘက်ကလည်း သုံးသပ်ကြပါတယ်။ အိန္ဒိယနိုင်ငံမှာ လွန်ခဲ့တဲ့ ၁၅နှစ်က စပြီး အလုပ်လုပ်ကြတဲ့ ရာခိုင်နှုန်းဦးရေလည်း နည်းလာတာတွေ့ရှိရပါတယ်။ အထူးသဖြင့် အလုပ်လုပ်နိုင်ကြတဲ့ အမျိုးသမီးဦးရေထဲက ၂၀ရာခိုင်နှုန်းက လုပ်ခကြေးနည်းတဲ့ အလုပ်ကြမ်းတွေသာ လုပ်နေကြပါတယ်။ ထိုမှတ်တမ်းတွေကိုတော့ အစိုးရရဲ့ မှတ်တမ်းထဲမှာ မမှတ်ယူထားပါဘူး။ နောက်တစ်ချက်ကတော့ အိန္ဒိယနိုင်ငံရဲ့ ပို့ကုန်က သွင်းကုန်ထက်နည်းနေတာကြောင့် နိုင်ငံရဲ့ စီးပွားရေးတိုးတက်ဖို့ အရှိန်ယူနေရတဲ့အချက်တစ်ခုလည်း ဖြစ်နေပါတယ်။
ထူးခြားတဲ့အချက်ကတော့ အိန္ဒိယနိုင်ငံမှာ စားသုံးသူ ၆၀ရာခိုင်နှုန်းက ပြည်တွင်းထုတ်ကုန်ကို ပြည်ပသွင်းကုန်ထက် ပိုသုံးစွဲပြီး ကြိုက်နှစ်သက်ကြပါတယ်။ ဒီအချက်က နိုင်ငံရဲ့ ထုတ်ကုန်မှုစွမ်းအားကို မြင့်မားစေပြီး စီးပွားရေးမှာ အခြားနိုင်ငံတွေအပေါ် အများကြီးမှီခိုအားထားစရာ မလိုတဲ့အချက်ပါပဲ။ စီးပွားရေး ကျွမ်းကျင်ပညာရှင်တွေက ၂၀၃၀ ခုနှစ်အကုန်ပိုင်းမှာတော့ အိန္ဒိယနိုင်ငံက ကမ္ဘာမှာ တတိယအကြီးဆုံး စီးပွားရေးအင်အားကြီးတဲ့ နိုင်ငံဖြစ်လာမယ်လို့ သုံးသပ်ထားကြပါတယ်။