သင့်မှာ ကောင်းမွန်တဲ့ဘ၀ကို ပိုင်ဆိုင်ထားတယ်ဆိုတာ ပြောပြနိုင်တဲ့ အချက် ၁၀ ချက်

ကျွန်တော်တို့ လူသားတွေက နေ့စဉ်ကောင်းမွန်တဲ့ဘ၀တွေကို ပိုင်ဆိုင်ဖို့အတွက် အလုပ်တွေဖိလုပ် ကြိုးစားနေတတ်ကြပါတယ်။ အင်စတာဂရမ်က သူများတွေတင်ထားတဲ့ပုံတွေကိုကြည့်ပြီး ကိုယ့်ဘ၀က သူတို့လောက်မကောင်းဘူး၊ မပြည့်စုံဘူးလို့ ထင်နေမိရင်တော့ သင့်အဖြေ မှားသွားနိုင်ပါတယ်။ သင့်မှာ ကောင်းမွန်တဲ့ဘ၀ကို ပိုင်ဆိုင်ထားတယ်ဆိုတာ ဒီအချက် ၁၀ချက်ကို ကြည့်ပြီး သုံးသပ်ကြည့်ရအောင်။

၁။ သင်ချစ်ရတဲ့ မိသားစုတစ်ခု ပိုင်ဆိုင်ထားခြင်း

သင်ချစ်ရတဲ့ မိသားစုတွေနဲ့ သင်အတူနေထိုင်နေရတယ်ဆိုရင် သင်ဟာအရမ်း ကံကောင်းလွန်းတဲ့ လူသားတစ်ယောက်လို့ ယူဆနိုင်ပါတယ်။ ကမ္ဘာပေါ်က နိုင်ငံအသီးသီးမှာ ကိုယ်ချစ်တဲ့ မိသားစုနဲ့အတူ မနေထိုင်ရပဲ အကြောင်းအမျိုးမျိုးနဲ့ ကွဲကွာနေတဲ့လူတွေ အများကြီးရှိပါတယ်။ သင့်မှာ ကံမကောင်းတဲ့နေ့တစ်နေ့ ရှိခဲ့ရင်တောင် သင် ရင်ဖွင့်စရာ သင်ချစ်တဲ့မိသားစု ရှိခြင်းက သင့်အတွက် အများကြီး ကံကောင်းတယ်လို့ ပြောနိုင်ပါတယ်။

၂။ အိပ်စရာနှင့် စားစရာအတွက် မပူပင်ရခြင်း

ကျောတစ်ခင်းစာ အိပ်ဖို့အတွက် အိပ်ရာတောင်မရှိတဲ့ အိမ်ခြေရာမဲ့ လူဦးရေပေါင်း အမေရိကန်နိုင်ငံမှာ တစ်သန်းကျော်အထိ ရှိပါတယ်။ ဒါ့အပြင် စစ်ပွဲကြောင့် အိုးအိမ်ရာမဲ့ဖြစ်ပြီး အစားအသောက်ပြတ်လတ်နေတဲ့ လူဦးရေကလည်း ကမ္ဘာတစ်လွှားမှာ သန်းနဲ့ချီရှိပါတယ်။ တစ်ခါတစ်လေ သင့်အလုပ်မှာ စိတ်ညစ်စရာ တစ်ခုခုနဲ့ ကြုံလာခဲ့ပြီး သင်အိမ်ပြန်လာခဲ့ရင် ကောင်းမွန်တဲ့အိပ်ရာနဲ့ သင်ကိုယ်တိုင် ချက်ပြုတ်နိုင်မယ့် မီးဖိုချောင်လေးရှိရင် သင့်ကိုယ်သင် ဂုဏ်ယူလိုက်ပါ။

၃။ လုံခြုံမှုရှိခြင်း

ညဘက်အိပ်တဲ့အချိန်မှစပြီး မနက်သင်နိုးထလာတဲ့အထိ သင့်အိမ်ပတ်ဝန်းကျင်က တိတ်ဆိတ်ပြီး လုံခြုံမှုရှိရင် သင်ဟာကောင်းမွန်တဲ့ ဘ၀တစ်ခုကို ပိုင်ဆိုင်ထားတယ်လို့ ဆိုနိုင်ပါတယ်။ ညသန်းခေါင် ခိုးဆိုးလုယက်မှု၊ လူသတ်မှုတွေကို ကြောက်စရာမလိုပဲ နှစ်နှစ်ခြိုက်ခြိုက် အိပ်နိုင်ခြင်းရဲ့ အရသာကတော့ ငြိမ်းချမ်းခြင်းရဲ့ အရသာပါပဲ။ သင့်ပတ်ဝန်းကျင်က မလုံခြုံဘူးဆိုရင်တော့ အိပ်ရေးပျက်တဲ့ညတွေနဲ့ စိတ်အမြဲ ချောက်ခြားနေမှာ ဖြစ်ပါတယ်။

၄။ ပညာရေး၊ အခွင့်အလမ်းများနှင့် ဝေးမနေခြင်း

ဒီအချက်ကတော့ လူတိုင်းမရနိုင်တဲ့ အခွင့်အလန်းလည်းဖြစ်ပါတယ်။ သင့်ဘေးပတ်ဝန်းကျင်မှာ ပညာရေးနှင့် ပတ်သတ်တဲ့အခွင့်အလန်းမျိုးတွေ့ရင် တန်ဖိုးထားပါ။ သင့်ဘ၀သက်မွေးဝမ်းကြောင်းအတွက် များစွာ အထောက်အကူ ဖြစ်နိုင်ပါတယ်။

၅။ ငွေကြေးလုံလုံလောက်လောက် ရှိခြင်း

သင့်မှာ ပုံမှန်ဝင်ငွေအလုပ်တစ်ခုရှိပြီး သင့်စားဝတ်နေရေးအတွက် ဖြေရှင်းနိုင်တယ်ဆိုရင် သင့်မှာ ကောင်းမွန်တဲ့ဘ၀တစ်ခု ပိုင်ဆိုင်နေပြီလို့ ပြောနိုင်ပါတယ်။ ကိုဗစ်ကာလက အလုပ်လက်မဲ့ ဖြစ်သွားတဲ့ ဝန်ထမ်းတွေနဲ့ လုပ်ငန်းတွေဆုံးရှုံးလိုက်ရတဲ့ လူတော်တော်များများက အခုချိန်ထိ ပုံမှန်ဝင်ငွေနဲ့ ရပ်တည်လို့ မရသေးပါဘူး။ သင့်မှာ ဝင်ငွေကောင်းတဲ့ အလုပ်တစ်ခုရှိနေပြီဆိုရင်တော့ သင်တန်ဖိုးထားပြီး အနာဂတ်အတွက် ကြိုပြင်ဆင်ထားသင့်ပါတယ်။

၆။ ပျော်ပျော်နေတက်ခြင်း

ပျော်ပျော်နေတက်ခြင်းက သင်ကိုယ်တိုင်အတွက်ရော သင့်ဘေးပတ်ဝန်းကျင်က လူတွေအတွက်ပါ ကောင်းမွန်စေပါတယ်။ လူအချို့တော်တော်များများက ကိစ္စတစ်ခုခုကို ရင်ဆိုင်ရတဲ့အခါမှာ စိတ်ဖီးစီးမှုတွေနဲ့ ရင်ဆိုင်ပါတယ်။ ဒါ့အပြင် မိသားစုအရေး၊ အချစ်ရေး၊ စီးပွားရေးတွေကိုပဲ တွေးပြီး ပျော်ရွှင်မှုအရသာကို ခံစားဖို့ မေ့နေတတ်ကြပါတယ်။ သင်ကိုယ်တိုင်က ပျော်ပျော်ပဲ နေထိုင်တက်တာ ကြိုက်တဲ့လူဆိုရင်တော့ သင့်အတွက်ဆိုတာ စိတ်ညစ်စရာ မရှိသလောက်နည်းပါးသွားပါလိမ့်မယ်။

၇။ ကိုယ့်ကိုယ်ကို ယုံကြည်မှုရှိခြင်း

သင်ကိုယ်တိုင် တစ်ယောက်တည်းနေထိုင်တဲ့အခါမှာ လွတ်လွတ်လပ်လပ်နဲ့ နေထိုင်ရတာကြိုက်ပြီး အခြားသူတွေ သင့်အပေါ်ထင်မြင်ယူဆချက်တွေကို လျစ်လျူရှုနိုင်တယ်ဆိုရင်တော့ သင့်မှာ ကောင်းမွန်တဲ့ဘ၀ကို ပိုင်ဆိုင်ထားတယ်လို့ ဆိုနိုင်ပါတယ်။

၈။ ခရီးသွားဖို့အခွင့်အရေး မကြာခဏရခြင်း

လူ့ဘ၀ဆိုတာက ခရီးသွားမှ အဓိပ္ပါယ်ရှိတယ်လို့ လူအတော်များများက ယူဆထားပါတယ်။ လူတိုင်းက ခရီးတိုဖြစ်ဖြစ် ခရီးရှည်ဖြစ်ဖြစ် အပျော်ထွက်ချင်ကြပါတယ်။ ငွေကြေးအရ အဆင်မပြေတဲ့ မိသားစုတွေအဖို့ ခရီးထွက်ဖို့ဆိုတာ အိမ်မက်တစ်ခုလိုပါပဲ။ သင့်မှာ နောက်ဆံတင်းစရာမရှိ ခရီးစိတ်ကြိုက် ထွက်နိုင်ရင်တော့ သင်က ကံကောင်းတဲ့လူသားတစ်ယောက်ပါပဲ။

၉။ ကျန်းမာရေးကောင်းမွန်နေခြင်း

ဒီအချက်ကို သင်ပိုင်ဆိုင်ထားရင်တော့ သင့်မှာ တန်ဖိုးဖြတ်လို့မရတဲ့ အရာကို သင်ပိုင်ဆိုင်ထားပြီလို့ ဆိုနိုင်ပါတယ်။ ငွေကြေးအတော်ချမ်းသာတဲ့လူတွေမှာ တစ်ချို့ကျန်းမာရေးမကောင်းတာကြောင့် အမြဲစိတ်ဒုက္ခရောက်နေရတာကို တွေ့ရပါတယ်။ သင်က ကျန်းမာရေးကောင်းမွန်တဲ့လူတစ်ယောက်ဆိုရင် သင်လုပ်ချင် ဖြစ်ချင်တာတွေကို လုပ်နိုင်သေးပါတယ်။ ကျန်းမာရေးမကောင်းတဲ့ လူတစ်ယောက် အတွက်ကတော့ မျှော်လင့်ချက်တွေက အလှမ်းဝေးသွားနိုင်ပါတယ်။

၁၀။ သင်လွတ်လွတ်လပ်လပ် ဆန္ဒထုတ်ဖော်ခွင့်ရှိခြင်း

သင့်မှာ မကျေနပ်တဲ့အရာတွေ၊ ဖိနှိပ်ခံထားရတဲ့အရာတွေကို လွတ်လွတ်လပ်လပ် ဖော်ထုတ်ခွင့်ရှိရင်လည်း သင်ဟာ ကံကောင်းတဲ့လူသားတစ်ယောက်လို့ ဆိုနိုင်ပါတယ်။ အာဏာရှင်နိုင်ငံတော်တော်များများမှာတော့ သင့်ရဲ့လွတ်လပ်တဲ့ ဆန္ဒကို ထုတ်ဖော်ခွင့်မရှိကြပါဘူး။ သင့်မှာ လွတ်လပ်စွာ ဆန္ဒထုတ်ဖော်ခွင့် ပိုင်ဆိုင်ထားရင်တော့ သင်က ကံကောင်းတဲ့လူသား တစ်ယောက်လို့ ဆိုနိုင်ပါတယ်။ အကြောင်းရင်းကတော့ လွတ်လပ်မှုကို သင်ပိုင်ဆိုင်ထားလို့ပါပဲ။

ဘ၀ဆိုတဲ့ အဓိပ္ပါယ်က အတက်အကျ တစ်လှည့်စီ ရှိနေတတ်ပါတယ်။ တစ်ခါတစ်လေမှာ ကိုယ့်ဘ၀ဆိုးတယ်လို့ ခံစားမိတဲ့အခါ ဒီစာလေးကို ဖတ်ခြင်းအားဖြင့် သင့်မှာ ကောင်းမွန်တဲ့အရာတွေ ပိုင်ဆိုင်ထားတယ်ဆိုတာ သတိပေးနိုင်မယ်လို့ ယူဆပါတယ်။