YouTube က YouTube Music app ထဲမှာ AI host (AI DJ) တွေ ထည့်သွင်းစမ်းသပ်နေပြီလို့ ကြေညာလိုက်ပါတယ်။ ဒီ AI host တွေက နားထောင်နေတဲ့ သီချင်းတွေအကြောင်း၊ နောက်ကွယ်က ဇာတ်လမ်းလေးတွေ၊ fan တွေသိချင်တဲ့ အချက်အလက်လေးတွေကို ရေဒီယို DJ တစ်ယောက်လို ကြားဖြတ်ပြောပြပေးသွားမှာပါ။
ဒီ feature က “YouTube Labs” လို့ခေါ်တဲ့ စမ်းသပ်မှုအစီအစဉ်ရဲ့ တစ်စိတ်တစ်ပိုင်းဖြစ်ပြီး လောလောဆယ်မှာတော့ US က သုံးစွဲသူအရေအတွက် အကန့်အသတ်နဲ့ပဲ စမ်းသပ်ခွင့်ပေးထားတာ ဖြစ်ပါတယ်။ နောက်ပြီး YouTube က သူ့ရဲ့ Premium feature တစ်ခုဖြစ်တဲ့ “jump ahead” (AI ကိုသုံးပြီး video ရဲ့ စိတ်ဝင်စားစရာအကောင်းဆုံးအပိုင်းကို တန်းကျော်ကြည့်နိုင်တာ) ကို TV နဲ့ game console တွေမှာပါ အပြည့်အဝ သုံးနိုင်ပြီလို့ ကြေညာခဲ့ပါတယ်။
YouTube ရဲ့ ဒီခြေလှမ်းက သီချင်းနားထောင်တဲ့ အတွေ့အကြုံကို playlist တစ်ခု play ပြီး ပစ်ထားလိုက်တာမျိုးထက် ပိုပြီး အသက်ဝင်လာအောင် ကြိုးစားလိုက်တာပါပဲ။ ရေဒီယိုနားထောင်ရသလိုမျိုး AI host က သီချင်းအကြောင်းတွေ ရှင်းပြတာကို ကြိုက်တဲ့သူတွေအတွက်တော့ ဒါက သဘောကျစရာ feature တစ်ခု ဖြစ်လာနိုင်ပါတယ်။
ဒါပေမယ့် တစ်ဖက်မှာလည်း သီချင်းကိုပဲ အနှောင့်အယှက်မရှိ ဆက်တိုက်နားထောင်ချင်တဲ့သူတွေအတွက်တော့ ကြားထဲက AI အသံက အာရုံနောက်စရာတစ်ခု ဖြစ်လာနိုင်ပါတယ်။ ခြုံပြောရရင်တော့ Google က သူ့ရဲ့ AI နည်းပညာတွေကို product တိုင်းထဲကို ဘယ်လိုထည့်သွင်းလို့ရမလဲဆိုတာကို နေရာတကာမှာ စမ်းသပ်နေတာပါ။ ဒီ feature အောင်မြင်မလား၊ အလုပ်မဖြစ်ဘူးလားဆိုတာကတော့ AI host က ဘယ်လောက် သဘာဝကျကျနဲ့ စိတ်ဝင်စားစရာကောင်းအောင် ပြောနိုင်မလဲဆိုတဲ့အပေါ်မှာပဲ မူတည်နေပါလိမ့်မယ်။
Discussion about this post