အလုပ်ရှင်တိုင်းတွေ့ချင်ကြတဲ့ Resume ထဲက Skills များ

အလုပ်တစ်ခုရချင်း မရချင်းရဲ့ အဓိကအကြောင်းရင်းကတော့ Skills တွေပဲဖြစ်ပါတယ်။ အပြိုင်အဆိုင်များတဲ့ခေတ်မှာ အလုပ်တစ်ခုရဖို့ကလည်း လွယ်ကူတဲ့အနေအထားမျိုး မဟုတ်ပါဘူး။ Skill ရှိတဲ့လူတွေအဖို့တော့ အလုပ်တွေက အမြဲအဆင်သင့်ရှိနေတတ်ပါတယ်။ မြန်မာပြည်နှင့် နယ်နိမိတ်ချင်းထိစပ်နေတဲ့ ထိုင်းနိုင်ငံမှာ အလုပ်ရှာရင်တောင် သူတို့နိုင်ငံသားတွေအဖို့ အများကြီးမလွယ်ကူတာ တွေ့ရပါတယ်။ အဓိကကတော့ ကိုယ်တတ်မြောက်ထားတဲ့ Skill တွေအလုံအလောက်မရှိရင်တော့ အလုပ်ရဖို့ အခွင့်အရေး အင်မတန်နည်းလှတာကို တွေ့ရပါလိမ့်မယ်။ (နိုင်ငံရပ်ခြားမှာ အလုပ်လုပ်ဖို့ ရည်ရွယ်ထားတဲ့ မြန်မာနိုင်ငံက လူငယ်များအနေနဲ့ အချိန်ပေးပြီး ဖတ်စေချင်ပါတယ်)။

Soft Skills နှင့် Hard Skills ကွဲပြားပုံ

Skill အကြောင်းပြောရမယ်ဆိုရင်တော့ အားလုံးသိကြပြီးတဲ့အတိုင်း Soft Skills နှင့် Hard Skills နှစ်မျိုးရှိကြပါတယ်။ Soft Skills ဆိုတာကတော့ ပေါင်းသင်းဆက်ဆံရေး၊ အချိန်တိကျခြင်း၊ ဦးဆောင်နိုင်စွမ်း စသဖြင့် ဆိုလိုတာဖြစ်ပါတယ်။ Hard Skill ဆိုတာကတော့ လက်ဆုပ်လက်ကိုင် ပြနိုင်တဲ့ Skills တွေဖြစ်ပါတယ်။ အလုပ်ရှင်တွေက Resume ကို ဖတ်ကြည့်တဲ့အခါ နှစ်ခုလုံးကိုကြည့်ကြပေမယ့် Hard Skill ကို အဓိက ကြည့်ကြပါတယ်။ ဥပမာ သင်က ဘယ်အရာတွေကို ကျွမ်းကျင်တက်မြောက်ထားပြီး ဘယ်လောက်အတွေ့အကြုံရှိလဲဆိုတာကို ကြည့်ကြပါတယ်။

ဆရာအလုပ်လျှောက်မယ့် လူတစ်ယောက်က ဘယ်ကျောင်းတွေမှာ စာသင်လဲဆိုတာထက် ဘယ်လိုနည်းလမ်းတွေနဲ့ ကလေးတွေကို သင်ကြားပေးလဲ၊ ဘာတွေလုပ်ဆောင်ခဲ့လဲဆိုတာ ကြည့်ကြပါတယ်။ ထို့အပြင် နည်းပညာနှင့်ပတ်သတ်တဲ့အလုပ်ကိုလျှောက်မယ့်လူ တစ်ယောက်ရဲ့ Resume မှာလည်း ဘယ် Companies တွေမှာအလုပ်လုပ်ခဲ့လဲဆိုတာထက် ဘာတွေလုပ်ဆောင်ခဲ့လဲ၊ ဘယ်လိုအကျိုးပြုခဲ့လဲဆိုတာကို အလုပ်ရှင်တွေက အဓိကထားကြည့်တာ ဖြစ်ပါတယ်။ Resume Genius တွေရဲ့ပြောပြချက်အရတော့ အခု Skills တွေကတော့ အလုပ်ရှင်တိုင်း သဘောကျတဲ့ Skills တွေ ဖြစ်ပါတယ်။

IT Skills
Software Development
Data Analysis

IT Skills လို့ပြောရာမှာ IT နဲ့ ပတ်သတ်ပြီး ကျွမ်းကျင်နေဖို့ မလိုပါဘူး။ သင့်အနေနဲ့ IT နယ်ပယ်က မဟုတ်ရင်တောင် AI Tools တွေနဲ့ ထိတွေ့ပြီး အလုပ်လုပ်ဖူးခဲ့တဲ့ အတွေ့အကြုံကို Skills ခေါင်းစဉ်အောက်မှာရေးခဲ့ရင် အလုပ်ရှင်တွေ စိတ်ဝင်စားမှာ အသေချာပါပဲ။ ၂၀၂၂ ခုနှစ်လောက်က စတင်ခဲ့ပြီးလူတွေရဲ့ အသုံးပြုမှုနဲ့ စိတ်ဝင်စားမှု မြင့်တက်လာတဲ့ AI ခေတ်ကြီးမှာ အလုပ်ရှင်တွေကလည်း AI ရဲ့အရေးပါမှုကို အမြဲစောင့်ကြည့်နေကြတာ ဖြစ်ပါတယ်။ ဒါကြောင့် Reusme ရဲ့ IT Skills ခေါင်းစဉ်အောက်မှာ Microsoft word, Excel, Powerpoint တို့လို လူတိုင်းရေးမယ့်အစား OpenAI လို နာမည်တွေ ရေးထားသင့်ပါတယ်။

OpenAI နှင့် ပတ်သတ်ပြီး သင်အောင်မြင်ခဲ့တဲ့ Projects တွေရှိရင် Resume မှာထည့်ရေးပါ။ ဥပမာ “With the help of OpenAI, I had successfully achieved in …………” ဆိုပြီး ရေးသားဖော်ပြတာမျိုး လုပ်ပါ။ သင်နှင့် AI တွဲလုပ်ပြီး အလုပ်ပြီးသွားတာမျိုးကို အလုပ်ရှင်တိုင်း သဘောကျပါတယ်။ အကြောင်းရင်းကတော့ ရလဒ်တွေက လူသားရဲ့အကူအညီနှင့် AI ရဲ့ အကူအညီပေါင်းစပ်ပြီး ထွက်လာတဲ့ရလဒ်တွေက သာမွန်ကောင်းလွန်လို့ဖြစ်ပါတယ်။ Data Analysis ကတော့ မားကတ်တင်းနယ်ပယ်နှင့်လည်း ထိစပ်နေတဲ့အပြင် IT Skills ရဲ့ခေါင်းစဉ်ထဲမှာလည်း တစ်ခုပါဝင်နေပါတယ်။ သင့်မှာ အတွေ့အကြုံအများကြီးမရှိရင်တောင် AI ကို သင်အသုံးပြုတယ်ဆိုတာကို အလုပ်ရှင်တစ်ယောက်အနေနဲ့ သိတဲ့အခါ သင့်အပေါ် ယုံကြည်မှာဖြစ်ပါတယ်။ ဥပမာ သင့်အနေနဲ့ Data Analysis အတွက် ရှိပြီးသား Data တွေကို ChatGPT အသုံးပြုပြီး တွက်ချက်လေ့လာခဲ့တယ်ဆိုတာမျိုး Resume မှာ ထည့်သွင်းရေးသားထားရင်တော့ သင့်အလုပ်ရှင်က သဘောကျမှာ အသေအချာပါပဲ။